Institut d'Estudis Occitans
Institut d’Estudis Occitans | |
Devisa: «La fe sens òbras, mòrt es» | |
Informacions generalas | |
Sigla | IEO |
Region | Espanha, França, Itàlia |
Tipe | associacion segon la lei francesa de 1901 |
Istòria | |
Creacion | 1945 |
Fondadors | Fèlix Castanh, Max Roqueta, Ismaèl Girard |
Organizacion | |
Presidéncia | Copresidéncia |
Site web | ieo-oc.org |
L'Institut d'Estudis Occitans (IEO) es una associacion culturala segon la lei de 1901, creada en 1945 a Tolosa, reconeguda d'utilitat publica (1949) e joinessa e educacion populara (1986).
Faguèt seguida a la Societat d'Estudis Occitans (SEO), que foguèt dissolguda en 1946.
A per tòca lo manten e lo desvolopament de la lenga e de la cultura occitanas per la direccion, l'armonizacion e la normalizacion de totes los trabalhs que pertòcan la cultura occitana dins son ensemble.
Presidents de l'IEO
[modificar | Modificar lo còdi]- 1945 - 1952: Joan Casso
- 1952 - 1957: Max Roqueta
- 1957 - 1959: Pèire Azéma
- 1959 - 1962: Robèrt Lafont
- 1962 - 1980: Pèire Bèc
- 1980 - 1981: Patric Choffrut
- 1981 - 1986: Bernat Giacomo
- 1986 - 1997: Robèrt Martí
- 1997 - 2001: Felip Carbona
- 2001 - 2010: Dàvid Grosclaude
- 2010 - 2022: Pèire Brechet
- Dempuèi 2022 - : presidéncia collectiva, 5 copresidents (Miquèu Arnaud, Cristian Bonnet, Esteve Ros, Eliana Tortet, Tederic Cahuzac)
Organizacion de l'IEO : sièti e associacions afiliadas
[modificar | Modificar lo còdi]L'IEO, en mai del sièti istoric, es una federacion organizada en seccions regionalas, seccions departamentalas o cercles locals que s'espandisson dins l'ensemble d'Occitània, mas unicament en França.
Sièti de l'IEO
[modificar | Modificar lo còdi]Lo sièti a Tolosa organiza la federacion en mai d'accions especificas en favor de la lenga e de la cultura occitanas. Organiza la revendicacion cap als podèrs publics en participant a d'associacions francesas e europèanas qui militan per la reconeiguda e lo desvolopament de la lenga occitana. L'IEO es membre d'EBLUL (ELEN França), dels RIRLC (Rescontres interregionals de las lengas e culturas regionalas), d'ELEN (European Language Equality Network), e del Collectiu Pour Que Vivent Nos Langues. Al nivèl europenc, participa al NPLD (Network to Promote Language Diversity). L'IEO participèt a l'organizacion de las maniftestacions pan-occitanas de 2005 (Carcassona), 2007 (Besièrs), 2009 (Carcassona), Tolosa (2012) e Montpelhièr (2015) en cò del collecitu Anem Per la Lenga Occitana. Interpela regularament los poders publics a l'escasença de las campanhas electoralas.
L'IEO anima d'accions especificas :
- Transmission de la lenga occitana als petitons : Campanhas de comunicacion, comunicacion gestuala, personatge de l'orsonet Patonet, edicion d'istòrias...
- Collècta e valorizacion dels toponimes e microtoponimes occitans : Mapa occitana amb OpenStreetMap. L'IEO publiquèt tanben un obratge de normalizacion dels toponimes a l'usatge dels collectors.
- Trabalh de lexicologia e de socializacion
- Rugbi
- Fotbòl
- Corsa landesa, en partenariat amb la Federacion francesa de la corsa landesa e la DASEN 40
- Corsa camarguenca
- Ajustas lengadocianas
- Matematicas
- Fisica
- Informatica
- L'occitan... qu'es aquò? libreton de presentacion e de vulgarizacion de la cultura occitan disponible en francés, alemand, anglés, castelhan, italian e catalan.
- Ensenhament de l'occitan de cap als adultes : l'IEO que recampa dins una mapa interactiva l'ensemble dels corses pels adultes disponibles en Occitània e en defòra.
- Observatòri de la lenga occitana e de la politica publica : l'IEO seguís e analisa las politicas publicas e las accions menadas en favor de la lenga occitana per presentar una analisi independenta de la situacion.
- Ofèrtas d'emplecs e d'estagis qui demandan una competéncia en occitan son recampadas dins un site Web, emplec.com.
- L'IEO desvolopa d'accions en favor de la presa en compte del torisme en occitan e/o amb una presa en compte de la cultura occitana. Desvolopa audiio-visitas guidadas amb izi.TRAVEL.
- Enfin desvolopa una marca de territòri, Oc Occitània, per marcar e identificar los actors de la societat civila qui se volon engatjar per l'occitan dins la Cultura, la Lenga, lo Torisme e l'Economia.
IEO-IDECO edicion-difusion de l'IEO
[modificar | Modificar lo còdi]L'IEO-IDECO es un establiment secondari de l'Institut d'Estudis Occitans gerit pel sièti de l'associacion.
Basat a Puèglaurenç, l'IEO-IDECO assegura d'un costat l'edicion de libres en occitan o sus la lenga e la cultura occitanas (IEO Edicions) - e la difusion/distribucion de sa produccion e de la de mai d'un ostal d'edicion (IEO Difusion), de la federacion o non. IEO Edicions publica a l'entorn de 12 libres per an.
Las seccions regionalas e las seccions departamentalas
[modificar | Modificar lo còdi]- L'estructuracion regionala de l'IEO foguèt modificada per la fusion de las regions en seguida de la Lei NoTRE
- En Novèla-Aquitania : IEO Aquitània e IEO Lemosin
- En Occitània-Pirenèus-Mediterranèa : L'IEO Lengadòc e l'IEO Miègjorn-Pirenèus an fusionat : IEO Occitània-Pirenèus-Mediterranèa
- En Provença-Aups-Còsta d'Azur : IEO - CREO Provença
- En Auvèrnhe Ròse-Aups : L'IEO Ròse-Aups e l'IEO Auvèrnhe an fusionat en 2021 per crear l'IEO Auvèrnhe-Ròse-Aups
- L'IEO es present dins l'ensemble dels departaments occitans e a París, manca en Bearn/Baish-Ador (Pirenèus Atlantics). Las seccions departamentalas menan d'accions especificas de terrenh (cors pels adultes, festivals, edicion, balètis...). L'Escòla Occitana d'Estiu fusionèt amb l'IEO 47 dins las annadas 2010.
Controvèrsias e estructuracion de l'occitanisme
[modificar | Modificar lo còdi]L'IEO patiguèt qualques crisis long de son istòria. La pus aguda se passèt a la fin dels ans 1970 e a l'inici dels ans 1980, quand s'afrontèron doas tendéncias: una qualificada de "populista", menada per Ives Roqueta e qu'aviá accedit al poder, e una qualificada d'"universitària" menada per Robèrt Lafont. En 1981, la tendéncia "universitària", amb Robèrt Lafont en tèsta, foguèt obligada de quitar l'IEO. Aquò faguèt desapar��isser gaireben completament las activitats de recèrca scientifica a l'IEO, que migrèron cap a d'organismes distints coma las universitats e l'Associacion Internacionala d'Estudis Occitans e, especialament en lingüistica, cap al Gidilòc e al Conselh de la Lenga Occitana. Totun, l'IEO a conservat fins a uèi un ròtle essencial dins lo domeni de l'animacion culturala e dins l'aculhença d'un grand nombre dels militants de la cultura occitana.
L'IEO participèt a la creacion del Congrès Permanent de la Lenga Occitana e militèt per la creacion de l'Ofici Public per la Lenga Occitana. Milita per l'apropriacion e l'usatge generalizats de Lenga occitana (per designar lo nom de la lenga, qual que siague lo dialècte) e d'Occitània (per designar lo territòri en França, Espanha e Italia ont se parla la lenga occitana).
En 2015, l'IEO mandèt a l'ensemble dels conselhèrs regionals de las regions Aquitània, Lengadòc-Rosselhon, Miègjorn-Pirenèus, Peitau-Charanta, Auvèrnhe, Ròse-Aups, Provença Aups Còsta d'Azur, Lemosin per presentar l'Occitània culturala e criticar la volontat de las regions Lengadòc-Rosselhon-Miègjorn-Pirenèus de s'apropriar lo nom Occitània.
Coordenadas
[modificar | Modificar lo còdi]Institut d'Estudis Occitans - IEO
11, carrièra Malcosinat
31000 Tolosa
Ligams
[modificar | Modificar lo còdi]- (oc) (fr) Sit oficial de l'IEO
- (oc) (fr) Sit de l'IEO Difusion e de l'IEO Edicions
- (oc) Sit de la carta Openstreemap en occitan
- (oc) Sit de l'emplec en occitan
- (oc) (fr) Sit del bilinguisme français/occitan
- (oc) (fr) Sit de la mediateca de l'IEO
- (fr) Sit aprenem l'occitan de l'IEO